Полиция қызметі жол қозғалысы ережелерін қатаң сақтауға шақырады. Бағдаршамның қызыл түсіне тоқтау — бәрімізге мәлім қарапайым талап. Алайда бұл ережеге бағынбай, жолды кесіп өтетін кейбір жүргізушілер өз өмірін ғана емес, айналасындағы адамдардың да өмірін қатерге тігеді.
Жуырда Лермонтов пен Бұқар жырау көшелерінің қиылысында патрульдік қызмет жүргізу кезінде Audi-80 автокөлігінің жүргізушісі бағдаршамның тыйым салынған сигналына қарамастан жолды кесіп өткені анықталды. Полиция аталған құқықбұзушыға заң аясында тиісті шара қолданды.
Өкінішке қарай, мұндай жағдайлар сирек емес. Кейбір жүргізушілер жол қозғалысы ережелеріне салғырт қарап, өз әрекетінің салдарын ескере бермейді. 2025 жылдың өзінде ғана 1265 жүргізуші бағдаршамның қызыл жарығына тоқтамай, жауапкершілікке тартылған.
Полицияның басты мақсаты — азаматтардың өмірі мен денсаулығын қорғау, қоғамдық қауіпсіздікті қамтамасыз ету және мүлікті сақтау. Осыған орай тәртіп сақшылары барлық жүргізушілерге үндеу жолдайды:
«Жолда қанша асықсаңыз да, ереже мен тәртіпті сақтаңыз. Бір сәттік жауапсыздық орны толмас өкінішке әкелуі мүмкін!»