Әзербайжан Сыртқы істер министрлігі 5 наурызда Нахчыван Автономиялық Республикасының аумағына Иран тарапынан дрон шабуылы жасалғанын мәлімдеді, – деп хабарлайды aqshamnews.kz тілшісі.
Ведомствоның хабарлауынша, бір ұшқышсыз аппарат әуежай терминалы ғимаратына тиген, тағы бірі мектеп маңына құлаған.
Әзербайжан СІМ мәліметінше, 5 наурыз күндіз Нахчыван Автономиялық Республикасының аумағына Иран Ислам Республикасының аумағынан ұшқышсыз аппараттар арқылы шабуыл жасалған. Бір дрон Нахчыван қаласындағы әуежай терминалының ғимаратына түскен, екіншісі Шакерабад ауылындағы мектеп ғимаратының маңына құлаған.
«Біз Иран Ислам Республикасының аумағынан жасалған бұл дрон шабуылдарын қатаң айыптаймыз. Соның салдарынан әуежай ғимараты зақымданып, екі бейбіт тұрғын зардап шекті. Әзербайжан Республикасының аумағына жасалған бұл шабуыл халықаралық құқықтың нормалары мен қағидаттарын бұзады әрі өңірдегі шиеленістің күшеюіне ықпал етеді», – делінген мәлімдемеде.
Министрлік Ираннан оқиғаға қатысты жақын уақытта нақты түсініктеме беруді, тиісті тергеу жүргізуді және мұндай жағдайлардың қайталануына жол бермеу үшін шұғыл шаралар қабылдауды талап еткен.
Сонымен қатар Әзербайжан тарапы «тиісті жауап шараларын қабылдау құқығын өзінде қалдыратынын» мәлімдеді.
Хабарламада Иранның Әзербайжандағы Төтенше және Өкілетті Елшісі Моджтаба Демирчилудың СІМ-ге шақырылғаны, иран тарапына қатаң наразылық білдіріліп, тиісті нота тапсырылатыны да айтылған.