Әлеуметтік желіде аутизмі бар балаларға қатысты дөрекі пікір жазып, сынға қалған блогер кешірім сұрап, видео жариялады, деп хабарлайды Aqshamnews.kz тілшісі.
Жарияланған видеода ол өз сөздерінің эмоцияға беріліп айтылғанын және ешқандай жаман ниетпен жазылмағанын жеткізді.
"Instagram-да бір видео көріп, өкінішке қарай, эмоцияға еріп өте ауыр пікір айтып қойдым. Бірақ мен ата-аналарды ренжіту немесе балаларға зиян тигізу ойымда болған жоқ. Бұл ашу үстінде жазылды, сөзімнің өзгелерге қалай әсер ететінін ойламаппын", – деді ол.
Блогер балаларға қатысты кез келген тақырыптың аса сезімтал қабылданатынын атап өтті.
"Сондықтан аутизмі бар балалардың ата-аналарынан шын жүректен кешірім сұраймын. Ешкімді ренжіткім келген жоқ, тек ойланбастан жазып қойдым. Балалар – әр ата-ана үшін ең қымбат. Ал баланың ауруын ешкім таңдамайды", – деді ол өз үндеуінде.
Еске салайық, бұған дейін Райхан есімді блогердің үстінен аутизмі бар балаларға қатысты жазған пікіріне қатысты іс қозғалғанын жазған едік.