Алматы қалалық полициясы аутизмі бар балаларды интернатқа тапсыруға шақырған блогерге қатысты қылмыстық іс қозғады, деп хабарлайды Aqshamnews.kz тілшісі.
Әлеуметтік желіні шулатқан пікір иесінің Instagram парақшасы даулы жазбасынан кейін аккаунты өшірілген не бұғатталған. Ата-аналар арасында наразылық күшейіп, жазбаның скриншоттары желіде тарап кетті.
Autism Kazakhstan қауымдастығы Бас прокуратура мен ІІМ-ге ресми сұрау жолдады. Ұйым өкілдері мұндай мәлімдемелер ата-аналардың ашу-ызасын туғызып, балалардың құқықтарын бұзатынын айтты.
Алматы Полиция департаменті аталған дерек бойынша қылмыстық іс тіркелгенін мәлімдеді.
"Блогердің тұлғасы анықталды, заң аясында шаралар қабылданады. Полиция қоғамды қорлайтын, әлеуметтік араздық тудыру белгілері бар, қатыгездік пен зорлық-зомбылықты насихаттайтын материалдар үшін қылмыстық және әкімшілік жауапкершілік көзделгенін ескертеді" делінген хабарламада.