Алматыда Ауғанстан өнімдерінің көрмесі ұйымдастырылды.
Ауғанстандық зергерлік бұйымдар – бұл ежелгі өнердің үлгісі, онда шеберлік, дәстүр мен халықтың мәдениеті астасады. Бүгінде ауған зергерлері өз ата-бабаларының рухымен жұмыс істеп, әлемнің түкпір-түкпірінде адамдардың жүрегін жаулайтын әшекейлерді жасайды.
Негізгі материалдар – алтын, күміс және мыс. Ауған зергерлерінің айрықша ерекшелігі – ел аумағында өндірілетін табиғи асыл тастарды қолдану. Бадахшан провинциясынан алынған лазурит әлемдегі ең жақсы деп саналады. Ал Ауған изумрудтары мен рубиндері өзінің тазалығы және түсінің қанықтылығымен танымал. Көптеген әшекей бұйымдар қолмен жасалады, және әрбір зергер бұйымның күрделілігіне байланысты бір айдан бірнеше айға дейін уақыт жұмсайды.
Ауғанстан жыл сайын шамамен 10 тонна зергерлік бұйымдар шығарады. Оның басым бөлігі экспортталады. Негізгі нарықтар – Таяу Шығыс, Еуропа, АҚШ және Қытай елдері. 2023 жылы зергерлік бұйымдардың экспорты шамамен 120 миллион АҚШ долларын құрады. Бұл бірегей ауған тастарымен безендірілген қолөнер бұйымдарына деген сұраныстың артып келе жатқанын көрсетеді. Көрмеде ляпис-лазурь, турмалин, нефрит, гагат, сапфир, зумрут және басқа да бағалы және жартылай бағалы тастардан жасалған әшекейлер ұсынылды.
«Қазақстан мен Ауғанстан арасында сауда-саттық артып келеді. Көрмеде қолөнер және зергерлік бұйымы, кілем, көкөніс пен жемістер, құрылыс материалдары, былғары өнімдері қойылған. Алматыға 150 бизнес қоғамының өкілдері келді. Бұл бизнес сауданың дамуына жоғары қызығушылық пен нығайтудың жоғары деңгейін көрсетеді , – деді ҚР Премьер-министрінің орынбасары Серік ЖҰМАНҒАРИН.
Екі ел арасындағы сауда-саттық, кәсіп саласы жандану үстінде. Бұл жайында Қазақстан сауда палатасының аймақтық өкілі Арман ЕСЕНТАЕВ сөз сөйледі.
«Екі жақты сауда ынтымақтастықты дамытуға үлес қосып, сауда-саттықты дамытып, екі ел арасындағы әлеуметтік, мәдени ықпалдастықты арттырып келеді. Қос тарап та бизнес қарым-қатынасына белсенді атсалысып жатыр, – деді ол.
Сонымен қатар сауда ынтымақтастықты одан әрі дамыту бағытында ой айтылды.
«Бұл көрменің мән-мағынасы зор. Өз кезегінде елдеріміз арасындағы сауда қатынастарының одан ары қарқын алуына пайдасын тигізеді. Сондай-ақ жеке сектордың өркендеуіне мүмкіндік береді», – деді Ауғанстан бизнес өкілі Нұрахмат Нури.
