Алматының Әуезов ауданында бұрын жарық желілері мен бағана болмаған 81 аумақта алғаш рет сыртқы жарықтандыру жүйесі іске қосылды. Бұл тұрғындар үшін маңызды жаңалық. Талай жыл бойы қараңғы болып келген аулалар мен көшелер енді жарық, жайлы және қауіпсіз бола түсті. Бұл туралы Әуезов ауданының әкімдігі хабарлады.
Жобаны «RKR Group and Co» ЖШС жүзеге асырды. Оның аясында 828 заманауи шам орнатылды: соның ішінде 507-і көше бойына, 321-і аулаларға арналған торшерлі шам. Жаңа электр желілерінің жалпы ұзындығы 15 шақырымнан асты. Барлық негізгі жұмыс аяқталды, мердігер ұйым ұсақ-түйек ескертулерді реттеп жатыр.
Бұдан бөлек, әлі де жарықтандыру толық қамтылмаған аумақтарға ерекше көңіл бөлініп отыр. Атап айтқанда, бұл Саин, Абай, Момышұлы, Төле би, Жандосов және Райымбек сияқты ірі магистральдар. Бұл көшелердің толық жарықтандырылуы Алматы қаласының қоғамдық кеңістіктерді дамыту басқармасының «қасбеттен қасбетке дейін» қағидаты бойынша іске асырылатын жобалары аясында қамтамасыз етіледі. Уақытша шешім ретінде мұнда 203 кронштейн шамы орнатылған.
«Бұл жоба ауданның дамуы үшін маңызды қадам. Біз тек шам орнатумен шектелмей, қалалық ортаның сапасын жақсарттық. Енді көше мен аула қауіпсіз әрі заманауи. Барлық жоспарланған жоба аяқталған соң ауданның сыртқы жарықтандыру деңгейі 100%-ға жетеді», – деді Әуезов ауданы әкімдігінің коммуналдық шаруашылық бөлімінің басшысы Ерсұлтан Жұмаханов.
