Әуезов ауданындағы 18 ғимаратқа архитектуралық жарықтандыру орнатылып, 37 тұрғын үйдің қасбеті қараша айының соңына дейін жөнделеді
«2023–2029 жылдарға арналған тұрғын үй-коммуналдық инфрақұрылымды дамыту тұжырымдамасы» аясында Алматы қаласының Әуезов ауданында тұрғын үй қоры жаңартылып жатыр. Өңірлік коммуникациялар қызметінің алаңында Әуезов ауданының әкімі Абзал Егембердиев осылай деді.
Оның айтуынша, Әуезов ауданында 1917 көппәтерлі тұрғын үй бар, олардың 797-сі 1960–1970 жылдары салынған. Биыл қайтарымды негізде 76 үйге жөндеу жұмыстары жүргізіле бастады. Оның ішінде 28 үйге жаңа лифттер (34 бірлік) орнатылып, 48 үйде шатыр мен инженерлік желілерді ауыстыру бойынша күрделі жөндеу жасалады. Жалпы инвестиция көлемі – 1,1 млрд теңге.
Сонымен қатар биыл қараша айына дейін 37 үйдің қасбеті жөнделіп, сырланады. 18 ғимарат осы заманғы архитектуралық жарықтандырумен безендіріліп, ауданның эстетикалық келбетін арттыра түспек.