Жетісу ауданында жол-көлік инфрақұрылымын дамытуды көздейтін үлкен жұмыс істеліп жатыр. Әсіресе тұрғындардың қауіпсіздігі мен жайлылығын қамтамасыз етуге ерекше көңіл бөліп отыр ауданда.
Аудан әкімі Ләззат Жылқыбаева Өңірлік коммуникациялар қызметінің алаңында хабарлағандай, 2025 жылы жалпы ұзындығы 26 шақырымды құрайтын 33 көшеде орташа жол жөндеу жұмыстары жүргізілген.
Сонымен қатар, «Техникалық тротуарларды абаттандыру» жобасы аясында 11 көшедегі жұмыс бітті. Олардың қатарында Көкмайса шағын ауданы, Боралдай, Жангелдин, Есенов, Жетісу, Құдабайұлы, Шекспир көшесі, сондай-ақ Сейфуллин даңғылы мен Солтүстік айналма жолы бар. Жұмыстың жалпы ауқымы 11 мың шаршы метрден асып түсті.
Аудандағы шұңқырлар да жөнделді: жол жамылғысының 33 мың шаршы метрден астам ақауы жойылып, 60 жаңа люк орнатылды, сондай-ақ 257-ден астам люк пен жаңбыр суын қабылдайтын құдық салынды.
«Көлік инфрақұрылымын дамыту – жұмысымыздың ең маңызды бағытының бірі. Біз Жетісу ауданының жолдарын ыңғайлы, қауіпсіз әрі ұзаққа шыдайтын етуді мақсат етіп отырмыз», - дейді Ләззат Жылқыбаева.
2026 жылы жол жөндеу барысында 30 мың шаршы метр асфальт жабындысы жөнделмек. Сондай-ақ ұзындығы 5 220 метр (шамамен 10 440 шаршы метр) тротуарларды қайта құрып, абаттандыру жағы қолға алынбақ.
Тұрғындардың өтініші бойынша жолдарды кеңейту мен абаттандыру үшін қажетті жер учаскелері сатып алынып жатыр.