Атырауда массажист пен клиент арасындағы жанжал адам өлімімен аяқталғаны анықталды, - деп хабарлайды Aqshamnews.kz тілшісі «Ақ Жайық» дерегіне сілтеме жасап.
Атырауда боди-массаж қызметін көрсеткен 30 жастағы әйелге қатысты қылмыстық іс бойынша жаңа деректер шықты. Бұған дейін әлеуметтік желіде оның клиентін өлтірді деген ақпарат тараған болатын.
Алдын ала мәлімет бойынша, оқиға жаз мезгілінде массаж қызметін көрсететін пәтерде болған. Әйел мен ер адамның арасында жанжал туып, сол сәтте ол клиентке пышақ жарақатын салғаны айтылған. Жәбірленуші жедел жәрдем келгенше көз жұмған.
Айтылған дерекке қарағанда, массажистка өзі полиция мен дәрігерлерді шақырған. Кейін оны құзырлы орган қызметкерлері ұстап, тергеу басталған.
Облыстық соттың баспасөз қызметі бұл факт бойынша сот өндірісінде іс жоқ екенін хабарлады. Алайда полиция тарапынан мұндай оқиғаның жазда болғаны расталды.
Қазіргі уақытта істің толық мән-жайы анықталып жатыр.