Атырауда итті күрекпен ұрған әйелдің іс-әрекетіне қатысты қылмыстық іс қозғалды, – деп хабарлайды aqshamnews.kz тілшісі.
Желіде тараған видеода әйел итті күрекпен аяусыз ұрып, жарақаттағаны көрінеді.
31 наурызда шамамен сағат 17:30-да полицияға үй жануарына қатыгездік көрсету дерегі туралы хабарлама түскен. Оқиға орнына жеткен тәртіп сақшылары көрсетілген мекенжайдан 39 жастағы әйелді анықтаған.
Полиция қызметкерлерінің мәліметінше, олар келген кезде әйел қарсылық көрсетіп, заңды талаптарды орындамаған. Осыған байланысты ол полиция қызметкерлерінің заңды қызметіне кедергі келтіргені үшін әкімшілік жауапкершілікке тартылды.
Сонымен қатар, жануарларға қатыгездікпен қарау дерегі бойынша қылмыстық іс қозғалды. Зардап шеккен жануарға қажетті ветеринариялық көмек көрсетілген.
"Қазір оқиғаның барлық мән-жайы анықталып жатыр. Жануарларға қатыгездікпен қарау — тұрмыстық "жанжал" емес, қылмыстық жауапкершілікке әкеп соғатын құқықбұзушылық. Мұндай барлық дерегі құқықтық баға берілетін болады", - деп мәлімдеді ПД баспасөз қызметі.