Атырау облысында Қызылқоға ауданы әкімінің орынбасары Ерболат Иғали жол апатынан қаза тапты, деп хабарлайды Aqshamnews.kz тілшісі «Ақ Жайық» басылымына сілтеме жасап.
Басылым мәліметінше, оқиға таңертең болған. Ерболат Иғали жүргізушісімен бірге қызметтік көлікпен жұмысқа бара жатқанда, көлік тасжолда аударылып кеткен. Апат салдарынан шенеунік оқиға орнында көз жұмды. Жүргізуші аман қалған.
Қайғылы жағдайды Атырау облысының әкімдігі растады.
«Қызылқоға ауданы әкімінің орынбасары Ерболат Айдынғалиұлы Иғалидің кенеттен қайтыс болуына байланысты оның отбасына, туған-туыстары мен жақындарына, сондай-ақ әріптестеріне қайғырып көңіл айтамыз», – деп мәлімдеді облыстық әкімдік.
Келесі айда Ерболат Иғали 46 жасқа толар еді. Артында бес баласы қалды.
Ерболат Иғали еңбек жолын аудандық газетте тілші болып бастаған. 2023 жылғы 30 қаңтардан бастап Қызылқоға ауданы әкімінің орынбасары қызметін атқарды.