2050 жылға қарай әлемде атом электр энергиясын өндіру көлемі 2,5 есе артуы мүмкін деген болжам бар. Бұл туралы МАГАТЭ агенттігі мәлімдеді, деп хабарлайды aqshamnews.kz
Қазіргі таңда 31 мемлекет атом электр станцияларының артықшылықтарын пайдаланып отыр, ал тағы 30 мемлекет осындай қуат көзін өндіруді қолға алуды жоспарлауда. Түркия, Мысыр және Бангладеш елдерінде атом станцияларының құрылысы аяқталуға жақын, алдағы бірнеше жылда олар іске қосылады.
Атом энергиясы жөніндегі халықаралық агенттіктің мәліметінше, әлемде атом энергетикасына деген қызығушылық артып келеді. Сала шағын реакторлар технологиясының дамуымен де күшейе түседі деп күтілуде.
Еуропа кеңесі бас хатшысының орынбасары Бьёрн Берге бұл туралы: – Жақында БҰҰ есебін оқыдым, онда атом энергиясының экологиялық тұрғыдан таза екені айтылған. Қауіпсіздік жүйелері, процедуралар мен атқарылған жұмыстар атом энергиясына деген қызығушылықты арттырды, – деді.
Жапонияның Страсбургтегі бас елшісі Хироюки Ушида да пікір білдіріп:
– Атом энергиясы қазіргі таңда маңызды энергетикалық ресурсқа айналды. Бұл салада ең бастысы – энергия қажеттілігі мен қауіпсіздік арасындағы тепе-теңдікті сақтау, – деп атап өтті.