«Қазақстандық атом электр станциялары» ЖШС Атом энергетикасы бөлімінің жетекші инженері Асуан Сиябеков Астана қаласының кәсіподақ қызметкерлерімен кездесу өткізді. Кездесу барысында А. Сиябеков еліміздің энергожүйесінің қазіргі жағдайы мен АЭС салудың қажеттілігі туралы егжей-тегжейлі баяндап, электр энергиясына деген сұраныстың артуы мен ескірген инфрақұрылымның мәселелерін атап өтті. Оның айтуынша, Қазақстандағы жылу электр станцияларының 70-80%-ы тозған, ал кейбір қалаларда бұл көрсеткіш 90%-ға дейін жетіп отыр. Мұндай жағдай электр қуатын өндіруде тұрақтылықтың төмендеуіне, үзілістер мен апаттық жағдайлардың көбеюіне әкелуі мүмкін.
– Екібастұз және Риддер қалаларындағы қазандықтардағы ақаулар бұл мәселенің айқын дәлелі болып отыр. Жылу электр станцияларының тозу деңгейі мен тұтынушылар санының артуына байланысты, елімізге жаңа энергия көздерін шұғыл түрде енгізу қажет, – деп атап өтті Асуан Сиябеков.
Сонымен қатар, ол атом энергетикасы жаңартылатын энергия көздерімен салыстырғанда тұрақты әрі сенімді екенін айтты. Күн мен жел энергиясы ауа райына тәуелді болса, АЭС үздіксіз жұмыс істеп, қажетті энергия көлемін тұрақты түрде өндіре алады.
– АЭС салу тек энергетикалық қауіпсіздікті қамтамасыз етіп қана қоймай, экологияны жақсартуға да айтарлықтай үлес қосады. Атом энергиясы көмір мен газ сияқты дәстүрлі көздерге қарағанда әлдеқайда таза әрі тиімді. Бұл Қазақстанның "жасыл" экономикаға көшуіне ықпал етеді, – деді Асуан Сиябеков.
Сиябеков сондай-ақ, Қазақстанның уран қорының молдығы АЭС салудың экономикалық тұрғыдан тиімділігін арттыратынын атап өтті. Уранның Қазақстандағы мол қоры елдің энергия саласын дамытып қана қоймай, энергетикалық тәуелсіздікті қамтамасыз етуге мүмкіндік береді.
– Қазақстан әлемдегі уран өндірісі бойынша көш бастап келеді, және бізде АЭС үшін қажетті шикізат та бар. Оны тиімді пайдаланып, еліміздің энергетикалық әлеуетін толық іске асыруымыз керек, – деп түйіндеді ол.