Астана қаласындағы Қошке Кемеңгерұлы атындағы №49 мектеп-гимназиясының 10 "А" сынып оқушысы Қуандық Амирхан ерекше жобасын таныстырды, деп хабарлайды aqshamnews.kz елорда әкімдігінің ресми сайтына сілтеме жасап.
Елордалық оқушы көру қабілеті нашар және мүлде көрмейтін жандарға арналған ақылды көзілдірік ойлап тапқан.
Жас өнертапқыштың бұл жобасы көзі нашар көретін адамдарға күнделікті өмірде көшеде еркін қозғалып, түрлі кедергілерден сақтануға мүмкіндік береді.
Ақылды көзілдіріктің басты ерекшелігі – адамның алдында бір метр қашықтықтан бастап кедергі пайда болғанда, алдын ала қазақ тілінде "Сақтаныңыз, алдыңызда кедергі!" деген дауыстық ескерту жасайды.
Қуандық Амирхан бұл көзілдірікті зағип жандардың қауіпсіздігін қамтамасыз ету мақсатында құрастырғанын айтады. Алдағы уақытта ол жұмыстың ауқымын кеңейтіп, басқа да нұсқамаларды енгізуді көздеп отыр.