Елорда прокурорлары жедел медициналық жәрдем станциясында жымқыру дерегін анықтады, - деп хабарлайды aqshamnews.kz тілшісі.
Елорда прокуратурасы Астана бойынша ҰҚК-нің департаментімен бірлесіп 2020-2023 жылдар аралығында жедел медициналық жәрдем станциясының бюджет қаражатын жымқыру схемасының жолын кесті. Арнайы прокурорлардың басшылығымен ведомствоаралық жедел-тергеу тобы құрылды.
Прокурорлар санитарлық автокөліктің бөлшектерін заңсыз есептен шығару және жалған қызмет көрсету шарттарын жасасу дерегі анықтады.
Соның нәтижесінде жұмыс істейтін автокөліктердің саны азайып, қалғандары қосалқы бөлшектерді жымқыру салдарынан пайдаланудан шығарылған.
Қазір "103" автопаркі толығымен қалпына келтірілді. 4 қызметкер, оның ішінде 2 басшы мен станция директоры ұсталды. Көрсетілген тұлғалардың әрекеттерінен мемлекетке 850 миллион теңге сомасында аса ірі залал келтірілген.
Олардың іс-әрекеттері Қылмыстық кодекстің "Кiнәлiге сенiп тапсырылған бөтен мүлiктi адамдар тобының алдын ала сөз байласуымен, өзінің қызмет бабын пайдалана отырып жасаған аса ірі мөлшерде бірнеше рет иемденiп алу", яғни ҚК-нің 189-бабы 4-бөлігі 2) тармағы, 189-бабы 3-бөлігі 1),2),3) тармақтары бойынша сараланды.
Қылмыстық іс сотқа жолданды.
