Астанада жүк көлігі кәмелетке толмаған велосипедшіні қағып кетті. Бала оқиға орнында көз жұмды, – деп хабарлайды aqshamnews.kz тілшісі.
Полиция мәліметінше, 26 мамыр күні Mercedes маркалы жүк көлігінің жүргізушісі Тәуелсіздік даңғылымен келе жатып, Пушкин көшесіне оңға бұрылған сәтте жолды кесіп өтіп бара жатқан велосипедшіні соққан.
Жол апаты салдарынан кәмелетке толмаған бала алған жарақатынан оқиға орнында қайтыс болды.
Бұл дерек бойынша қылмыстық іс қозғалды. Көлік арнайы тұраққа қойылды. Қазір оқиғаның мән-жайы анықталып жатыр.
Полиция жүргізушілерді жылдамдық режимін қатаң сақтауға, жаяу жүргіншілер өткелі, мектеп, аула және тұрғын үй маңында барынша сақ болуға шақырды.