Ұсынылған жобаларға салынатын инвестицияның жалпы көлемі шамамен 40 млрд теңгені құрайды, деп хабарлайды aqshamnews.kz тілшісі.
Астана қаласының әкімі Жеңіс Қасымбек Instagram парақшасында қандай инвестициялық жобаларға қолдау көрсетілгені туралы жазды.
«Қалаға жеке инвестиция тарту бағытында жүйелі жұмыс жүріп жатыр. Инвестициялық штаб отырысында бірқатар жобаны қарадық. Мәселен, шыны пакеттері мен қасбеттік жүйелер өндіретін зауыт, лифт, эскалатор және өзге де көтергіш механизмдер шығаратын өндірістік-технологиялық орталық, алкогольсіз сусындар шығаратын өндірістік-логистикалық кешен, қойма орындары бар косметика және парфюмерия өндіретін кәсіпорын салу жобалары және басқа да бастамалар талқыланды», – деп жазды Жеңіс Қасымбек.
Елорда әкімінің айтуынша, ұсынылған жобаларға салынатын инвестицияның жалпы көлемі шамамен 40 млрд теңгені құрайды. Оларды 2026-2029 жылдары іске асыру жоспарланып отыр, соның нәтижесінде 1 700-ден астам жаңа жұмыс орны ашылмақ.
«Былтыр елорда экономикасына шамамен 2,5 трлн теңге инвестиция салынды. Олар өңдеу өнеркәсібі, логистика, көлік, әлеуметтік инфрақұрылым және экономиканың өзге де негізгі салаларындағы жобаларға бағытталды. Өңірлік инвестициялық штаб отырыстарын тұрақты түрде өткізіп, жобаларды жүзеге асырудың барлық кезеңінде инвесторларға жан-жақты қолдау көрсетеміз», – деп жазды шаһар басшысы.