Астанада жеті жасар шөбересіне жыныстық зорлық жасаған 82 жастағы ер адамға қатысты сот үкімі шықты, деп хабарлайды Аqshamnews.kz тілшісі.
Ақпаратты НеМолчиKZ қорының жетекшісі Дина Смайылова Facebook парақшасында жариялаған. Оның жазуынша, қайғылы оқиға баланың туған күнін атап өту кезінде, туыстары жиналған үйде болған. Қарт адамды қылмыс үстінде отбасы мүшелері ұстап қалған.
Істің мән-жайы куәгерлердің көрсетулері мен сот-медициналық сараптамалардың қорытындыларымен расталған. Сот ер адамды ҚР Қылмыстық кодексінің 121-бабының 4-бөлігі («Сексуалдық сипаттағы зорлық-зомбылық әрекеттері») бойынша кінәлі деп танып, 20 жылға бас бостандығынан айыру жазасын тағайындады.
Дина Смайылованың айтуынша, жәбірленуші қыздың анасы қорға 2025 жылдың 5 сәуірінен 6 сәуіріне қараған түні, баланы сараптамаға апарғаннан кейін бірден хабарласқан.
Құқық қорғаушы айыпталушының қылмысын жақсы түсінгенін, ұсталған сәтте қашып кетіп, бір тәулік бойы ізін жасыруға тырысқанын атап өтті. Сонымен қатар, отбасында күдіктінің жасының үлкендігін алға тартып, істі сотқа жеткізбеуді ұсынғандар да болған.
