Астанада бүгіннен бастап бірқатар ұйымдар жаңа жұмыс кестесімен жұмыс істей бастады. Қала әкімдігінің мәліметінше, бұл қадам жолдағы көлік кептелісін азайту үшін қолға алынған,- деп хабарлайды Аqshamnews.kz тілшісі.
Жаңа тәртіп қала орталығындағы мемлекеттік және жартылай мемлекеттік мекемелерге қатысты. Енді қалалық коммуналдық қызметтер мен әкімдік қызметкерлері жұмыс күнін таңғы 7:30-да бастайды. Кейбір мемлекеттік органдар мен жартылай мемлекеттік компаниялар да жұмысқа 7:30-8:00 аралығында кіріседі. Тиісінше, жұмыс уақытының аяқталуы да ертерек болады.
Әкімдік атап өткендей, бұл өзгеріс жеке секторға, бизнес нысандарына, мектептер мен балабақшаларға, ауруханалар мен емханаларға, ХҚКО-лар мен өзге де әлеуметтік мекемелерге қатысты емес. Кейбір министрліктер мен мемлекеттік органдар бұрынғыдай таңғы 8:00-де жұмысын бастайды.
Айта кетсек, Астанада жұмыс кестесін ертерекке ауыстыру туралы мәселе биыл наурызда көтерілген. Маусымда қала әкімі Жеңіс Қасымбек бұл ұсыныс мемлекеттік органдар мен коммуналдық қызметтер үшін қарастырылып жатқанын айтқан. Ал мәжіліс депутаты Асылбек Нұралин орталық билік органдары мен ұлттық компаниялардың жұмыс уақытын 07:00 немесе 08:00-ге ауыстыруды ұсынған еді.
31 тамызда әкімдік жұмыс кестесінің ресми түрде өзгергенін жариялады. Жергілікті билік бұл шешім көлік ағынын реттеп, магистральдардағы жүктемені азайтуға көмектеседі деп күтіп отыр.