ҚМА Маңғыстау облысы бойынша департаменті "Өзен көлік құрастыру зауыты" ЖШС басшылығына қатысты үлескерлік құрылыс ретінде азаматтардың қаржысын заңсыз тарту дерегі бойынша жүргізілген тергеуді аяқтады, - деп хабарлайды aqshamnews.kz тілшісі.
Екі жыл бойы компания басшылығы Жаңаөзен қаласында "Astana Rich Village" тұрғын үй кешенін қажет рұқсат құжаттарынсыз, жобалық-сметалық құжаттамасыз, мемлекеттік сараптама мен авторлық қадағалаусыз салғаны анықталды.
Тұрғындардың қаржысын тарту үшін түрлі интернет-ресурстарда пәтерлердің нарықтан төмен бағамен сатылатыны туралы жалған жарнамалар жарияланған. Соның нәтижесінде 23 азаматпен алдын ала сатып алу-сату туралы жалған келісімшарттар жасалған.
Заңсыз тартылған қаражат көлемі 303 миллион теңгеден асты.
Тергеу мәліметінше, жиналған ақша құрылыс материалдарын алуға жұмсалғандай көрсетіліп, кейін кәсіпорын кассасынан қолма-қол ақшаға айналдырылып, шын мәнінде жеке қажеттіліктерге бағытталған. Ал тұрғын үй құрылысы аяқталмай қалған.
Үлескерлердің мүддесін қорғау мақсатында сот санкциясымен күдіктілерге тиесілі мүлікке - тұрғын үй, пәтер, екі автокөлік және үш жер учаскесіне тыйым салынды.
Күдіктілердің бірі қамауға алынса, екіншісіне бұлтартпау шарасы ретінде кепіл қолданылған.
ҚР ҚПК-нің 201-бабы бойынша өзге ақпарат жарияланбайды.
