Өйткені Қазақстандағы жағдай қалыпты болғанымен, көрші мемлекеттердегі жағдай күрделі күйінде қалып отыр.
Бұл туралы бүгінгі Үкімет отырысында ҚР Премьер-Министрі Асқар Мамин айтты, деп хабарлайды Almaty-akshamy.kz.
«Жалпы, санитариялық-эпидемиологиялық жағдай бақылауда. Ауруханалардағы орындардың жүктемесі 25 пайыз және жансақтау бөлімдерінде 21 пайызды құрап отыр. Елорда «қызыл» аймақта, вирус жұқтырғандар саны азаймай тұр. Бұл елордада қабылданып жатқан шаралардың жеткіліксіз екенін және вакцина салу қарқыны төмен екенін көрсетеді. Жалпы, өңірлердің басым бөлігі - «жасыл» аймақта, 5 өңір - «сары» аймақта», - деді Үкімет басшысы.
Оның дерегінше, бүгінгі күні 2,8 миллионнан астам адам бірінші компонентті, 1,7 миллионнан астам адам екінші компонентті салдырды.
«Өздеріңізге белгілі, елордада коронавирустың «дельта» штамына тән мутацияның ықтималдығы анықталып отыр. Оның таралу жылдамдығы өте жоғары, жылдам өршиді және салдары анағұрлым ауыр. Осы ретте бүгін Ведомствоаралық комиссияның отырысын өткізуді және Нұр-Сұлтан қаласындағы санитариялық-эпидемиологиялық талаптарды қатаңдату бойынша іс-шараларды қабылдауды тапсырамын», - деді Премьер-Министр.
Асқар Маминнің айтуынша, қазіргі таңда жалпы Қазақстандағы жағдай қалыпты болғанымен, көрші мемлекеттердегі жағдай күрделі күйінде қалып отыр.
«Сондықтан мемлекеттік шекарада бақылауды күшейту керек. Осы ретте санитариялық-эпидемиологиялық талаптардың қатаң сақталуына және вакцинация қарқының өсіруге баса назар аудару қажет», - деді Үкімет басшысы.