2023 жылы әскери ұшқыштардың жалақысы орташа алғанда 60 пайызға өседі.
Бұл жөнінде Мемлекет басшысы Қасым-Жомарт Тоқаев 5 мамыр күні өткен Бүкілармиялық кеңесте мәлім етті, деп хабарлайды Almaty-akshamy.kz Astanatv.kz-ке сілтеме жасап.
Сондай-ақ Президент осы саладағы оқытушылар мен дәрігерлердің жалақысы да көбейетінін айтты.
«Келесі жылы әскери атақ үшін төленетін айлық ақы 30 пайызға артады. Олар тұрмысына алаңдамай, ел қорғауға сақадай сай болуы керек», - деген Мемлекет басшысы әскери қызметшілерді зейнетақымен қамту мәселесі де қайта қаралып жатқанын атап өтті.
«Сержанттарды, офицерлерді әлеуметтік қолдау жұмысы жалғасады», – деді Президент.
Қорғаныс және қауіпсіздік саласы елімізді тұрақты дамыту ісінде айрықша маңызды рөл атқарады.
«Айбынды армия – қасиетті жерімізді және елімізді қорғайтын сенімді қалқан. Халқымыз алаңсыз өмір сүруі үшін әскери қызметшілер өз міндетін мүлтіксіз атқаруы керек», - деді Қасым-Жомарт Тоқаев.
Сөз соңында Президент Отан күзетіндегі әрбір жауынгер антына адал болатынына сенім білдірді.