Астанада әлеуметтік желідегі Threads платформасында әскердегі зорлық туралы жалған жазба жариялаған күдікті ұсталды, деп хабарлайды Aqshamnews.kz тілшісі.
Polisia.kz мәліметінше, 23 ақпанда Threads желісінде анонимді жазба жарияланып, оның авторы әскерде қызмет еткен кезде өзіне сексуалдық зорлық жасалғанын мәлімдеген. Сондай-ақ ол қудалаудан қорқатынын айтып, елден шұғыл кету үшін қаржылай көмек сұраған. Жазбаға ақша аударуға арналған банк деректемелері де тіркелген.
Алайда жазбаның шынайылығына күмәнданған желі қолданушыларының бірі полицияға жүгінген. Тексеру барысында көрсетілген банк шотының 17 жастағы жасөспірімге тиесілі екені анықталған. Оның айтуынша, шот деректерін ол хостелде танысқан адамға берген. Әлгі адам өз есепшотында мәселе барын айтып, ақша аударымдары үшін көмектесуді сұраған.
Екі күн ішінде бұл есепшотқа жүзден астам аударым түскені белгілі болды.
Жедел-іздестіру шаралары барысында жазбаның авторы анықталып, ұсталды. Полицияның мәліметінше, жарияланған ақпарат шындыққа сәйкес келмейді. Сонымен қатар күдіктінің әскерге мүлде қатысы болмаған және ешқашан әскери қызмет өтемегені анықталған.
Тергеу нұсқасына сәйкес, 23 жастағы азамат жалған ақпаратты әдейі ақша жинау мақсатында жариялаған. Аталған фактілер бойынша көрінеу жалған ақпарат тарату және алаяқтық баптарымен қылмыстық істер қозғалды. Күдікті сот санкциясымен қамауға алынып, уақытша ұстау изоляторына қамалды.