Білім және ғылым министрлігінің аппарат жиналысында министр Асхат Аймағамбетов оқу бағдарламалары жаңартылатынын айтты, деп хабарлайды Аlmaty-akshamy.kz

Орта білім беру саласындағы басты міндет – оқу бағдарламаларын жаңарту. Әсіресе, мұғалімдер бағдарламаның кейбір тұстарын жөндеу керегін айтып жүр. Оны сарапшылар да көтерген болатын. Бұл сын орынды. Бағдарламалардың кемшіліктерін түзеу керек. Бұл – ауқымды, күрделі, маңызды жұмыс. Онымен айналысатын жұмыс тобы құрылды. Олар штаттық режимде жұмыс істеулері керек. Онлайн форматта оның тиімділігі жоғары болмайды, - деді БҒМ басшысы.

Министрдің сөзінше, жұмыс тобының құрамына әдіскерлер, елдің үздік мұғалімдері, ғалымдар, сарапшылар мен мамандар тартылуы керек.

- Оқу мақсаттары тым күрделі, қайталауға уақыт аз, жас ерекшелігі тұрғысынан ерте берілген тақырыптарға қатысты сын-пікірлер көптен бері айтылып жүр. Сол себепті осы бағыт бойынша жұмыс істеуіміз керек. Бұл бағдарламалар  2015 жылы бекітіліп, оған 2016 жылдан 2021 жылға дейін мектептер кезең-кезеңімен көшті. Әрине, орта жолда тоқтатып қойып, оған өзгерістер енгізуге де болмайды. Енді олардың тиімді де, тиімсіз жақтарын байқаған соң кешенді жұмысты жүргізуіміз қажет, - деп атап өтті Асхат Аймағамбетов аппарат жиналысында.

Бас ұстаз атап өткендей, типтік оқу бағдарламаларын жаңартқаннан кейін типтік оқу жоспарлары бойынша да жұмыс жүргізіледі.