Қаржылық мониторинг агенттігі (ҚМА) ауқымды алаяқтық схема туралы мәлімет таратты. Asar Baspana қаржы пирамидасының ұйымдастырушылары Туғанбаев пен Байтасов мыңдаған азаматтың ақшасын алдап, орасан зор пайда тапқан.
Қаржы пирамидасы тұтынушылық кооператив ретінде жасырынған. Компанияның нақты өндірістік қызметі болмағанына қарамастан, ұйымдастырушылар 86 мың адамды өздерінің схемасына тартқан.
Алаяқтар Asar Baspana Алматыда құрылыс материалдарын өндіреді, тігін цехы және тұрмыстық техника мен медициналық жабдықтар шығаратын зауыты бар деп сендірген. Алайда, шын мәнінде, олар тек өз брендінің логотипін дайын тауарларға жапсырумен шектелген.
ҚМА мәліметінше, Туғанбаев пен Байтасов ондаған мың адамды алдап, 12,4 миллиард теңгені қалталарына басқан. Олар ай сайын 30%-ға дейін пайда түседі деп уәде бергенімен, бұл жалған сөз болып шықты. Алаяқтар 3,8 миллиард теңгені жеке қажеттіліктеріне жұмсап үлгерген.
2024 жылдың желтоқсанында, салымшылар күмәндана бастағанда, ұйымдастырушылар жаңа автобизнес ашылды және ірі дилерлермен серіктестік орнатылды деген жалған ақпарат таратқан. Бірақ тергеу барысында көліктердің салымшылардың ақшасына сатып алынып, Туғанбаевтың туыстарының атына рәсімделгені белгілі болды.
2025 жылдың ақпанында алаяқтық әрекеттер әшкереленіп, Туғанбаев өз командасына Asar Baspana сайтының жұмысын тоқтатуды бұйырған.
9 ақпанда ҚМА қызметкерлері 49 кеңсе мен 81 күдіктінің тұрғылықты жеріне тінту жүргізді. Тергеу барысында серверлік мәліметтер қалпына келтірілді.
Тәркіленген мүлік:
- 1,1 миллиард теңге,
- 10 қымбат көлік,
- Ақтауда, Туғанбаевтың бауырының үйінен табылған 945 миллион теңге.
Сонымен қатар, банктегі 1,2 миллиард теңге бұғатталды.
11 ақпанда Туғанбаев пен Байтасов екі айға қамауға алынды. Тергеу амалдары жалғасуда.