Қазақстанның халық әртісі, Мемлекеттік сыйлықтың лауреаты, Қазақстанның Еңбек Ері Асанәлі Әшімұлы Қазақ елін Тәуелсіздік мерекесімен құттықтап, жүрекжарды тілегін арнады.
«33 жыл дегеніңіз онша көп сан емес, бірақ маңызы өте үлкен. Еліміз ешкімге тәуелді болмай, дербес, үлкен мемлекет болғанымыз – халықтың бақыты! Бізге осы Тәуелсіздікті ұстап тұру – ең басты міндет. Сол үшін әрқайсымыз өз орнымызда аянбай еңбек етуіміз керек», – дейді актер.
Асанәлі Әшімұлы бүгінгі күннің басты құндылықтарын атап өтті:
«Қазіргі жағдайда тұрмысымыз жақсы, бейбіт өмір сүріп жатырмыз. Енді әркім өзінен артылғанын ортақ іске, халықтың игілігіне арнаса, үлкен қорымыз толыға түседі. Бұл – біздің болашаққа қосқан үлесіміз».
Ұлттың мақтанышына айналған Асанәлі Әшімұлы ел Тәуелсіздігін сақтау мен нығайту жолында бірлік пен еңбек қажеттігін ерекше атап өтті