33 жастағы Әсел Қуанышбаеваның туыстары Қостанайдағы жеке клиникада болған жағдайға қатысты тергеу жүргізуді талап етіп отыр. Олардың айтуынша, артық майды алып тастау операциясынан кейін Әсел жансақтау бөліміне түскен. Әйел облыстық ауруханаға сепсис, іріңді перитонит, пневмония және ауыр дәрежелі анемия диагноздарымен шұғыл жеткізілген. Оның ағзалары жұмыс істемей қалған, - деп жазады Аqshamnews.kz тілшісі “НГ” материалдарына сілтеме жасап.
Әселдің анасы Гүлжан Есмұратованың айтуынша, қызы ажырасқаннан кейін кейін өз келбетін өзгерткісі келген. Құрбысы дене пішінін сәтті өзгерткеннен кейін, Әсел де липосакция жасауға шешім қабылдап, Қостанайдағы сол жеке клиникаға жүгінген.
4 шілдеде Әселге айналмалы липосакция жасалған. Анасының сөзінше, операциядан кейін-ақ қызы ішінің қатты ауыратынын айтып шағымдана бастаған. Алайда клиника дәрігерлері бұл қалыпты жағдай деп, ауырсынуды басатын дәрілер жазып берген. Үшінші күні Әсел үйіне шығарылған, бірақ оның жағдайы күрт нашарлаған. Жедел жәрдем шақырылып, әйел шұғыл түрде ауруханаға жеткізілген. Қалалық ауруханада оған үш шұғыл операция жасалған.
Гүлжан Есмұратованың айтуынша, ауруханаға түскен кезде дәрігерлер сепсис, мықын ішегінің тесілуі, жайылған іріңді-фиброзды перитонит, терминалдық фаза, айналмалы липосакциядан кейінгі жағдай, пневмония, ауыр дәрежелі созылмалы анемия және көп ағзалық жеткіліксіздік деген диагноз қойған.
Қостанай қалалық ауруханасының мәліметінше, жеке клиникада жасалған операция барысында ішек тесілген – бұл өте сирек әрі өмірге қауіп төндіретін асқыну. Жергілікті дәрігерлер Алматыдағы Ұлттық ғылыми хирургия орталығымен телемедицина арқылы кеңес жүргізуге мәжбүр болған.
"Шұғыл операция ауыр өтті, бірақ толық көлемде жасалды. Хирургиялық араласу дұрыс болғанын мамандар растады және әрі қарай емдеуге қатысты ұсыныстар берілді, олардың барлығы орындалды", – деді Қостанай қалалық ауруханасы бас дәрігерінің міндетін атқарушы Қуат Әлмағамбетов.
Оның айтуынша, Әсел қазір де жансақтау бөлімінде жатыр, бірақ жасанды тыныс алу аппаратына қосылмаған, есін біледі, өзі тыныс алып, тамақтанады. Жағдайы жақсарып келеді.
Әселдің анасы операция жасаған клиника өз кінәсін мойындамай отырғанын айтты. Дегенмен олар моральдық өтемақы ретінде ақша ұсынған, бірақ бұл үшін пациент тарапынан ешқандай талап қоймайтыны жөнінде қолхат жазу шартын қойған. Отбасы мұндай ұсыныстан бас тартқан.
"Адвокат жалдадым. Енді полицияға, прокуратураға жүгінеміз. Әділ тергеуге үміттенеміз", – дейді зардап шеккен әйелдің анасы.
Жеке клиника өкілдері бұл жағдайға қатысты кейін пікір білдіретінін айтқан.