Көбелектер көрмесі
Ақ көбелек, көгілдір көбелек, емен көбелегі, барқыт көбелек, бұйра көбелек, мүр көбелек, қан көбелек, түн көбелектері, нимфалидалар сияқты Қазақстанда, сондай-ақ әлемде кездесетін көптеген көбелек түрлері Art Galaxy Alma-Ata көрмесінің ажарын ашты, деп хабарлайды Almaty-akshamy.kz
Адамзатқа бор дәуірінен белгілі болған қабыршақ қанаттылардың бүгінде жер шарында жүз мыңнан астам түрі кездеседі. Ал Қазақстанды мекендейтін тропикалық жәндіктердің 3 мыңнан астам сирек түрі «Қызыл кітапқа» енген.
Жәндіктердің раритетті түрлері көздің жауын алып қана қоймай, әсемдік әлеміне ерекше қамқорлықпен, жанашырлықпен қарауды қалайды. Бұл көрмеде 20 сантиметрге жететін ең ірі қоңыз, сонымен қатар әлемдегі төрт коллекционердің ғана жинағында кездесетін энтомологиялық үлгілер бар.
Белгілі профессор, энтомолог, натуралист Павел Мариковскийден тәлім алған энтомолог Карина Сәрсенова өз топтамасын жабайы әлемдегі әсем жәндіктермен жиырма жыл бойы толықтырып келген. Көрме арнайы шақырылған ғалым, энтомолог Мәскеу мемлекеттік университетінің профессоры Александр Петровтың жетекшілігімен өтті.
Бұл қордағы үлгілер әлемнің 30-дан астам елінен жиналған. Зергерлік шеберлікпен топтастырылған қанатты экспонаттар ішінде Қазақстандағы тропикалық жәндіктердің энтомологиялық топтамасы ерекше көз тартады.