Желіде Жетісу облысында аудандық мәслихат депутаты Дәурен Слямовты Үшарал қаласында пышақтап кеткені туралы ақпарат тарады.Мұны облыстық полиция департаментінің баспасөз қызметі растады.
«15 қаңтар күні сағат 15:25-те Алакөл аудандық полиция бөліміне Үшарал қаласында салынып жатқан құрылыс нысандардың бірінде ішімдік ішкен азамат жұмысшыларға тиісіп жатқаны туралы хабар түсті. Күдікті 24 жастағы жергілікті тұрғын жұмысшыларды қорғамақшы болған 34 жастағы ер адамды пышақтап, оқиға орнынан қашып кеткен», - деп хабарлады полиция.
Оқиға орнына бес минут ішінде жеткен полиция қызметкерлері күдіктіні ұстады. Алайда Дәурен Слямов алған жарақатынан жедел жәрдем көлігінде көз жұмды.
Ұсталған күдікті Алакөл аудандық полиция бөлімінің уақытша ұстау изоляторына қамалды. Аталған факті бойынша қылмыстық іс қозғалып, қажетті сараптамалар тағайындалды.