Алматыдағы коммуналдық ақылы тұрақтарда бір сағаттың құны енді бірдей емес: аймақтың жүктемесіне қарай 100, 150 немесе 200 теңге. Шешімді қалалық мәслихат 2026 жылғы 18 қыркүйекте қабылдады, ал әкімдік 30 қыркүйекте жаңа тарифтің іске қосылатынын жариялады.
Бұған дейін қаланың барлық ақылы тұрағында бір тариф – сағатына 100 теңге қолданылып келді. Бұл баға 2016 жылдан бері, яғни 10 жыл бойы өзгермеген. Енді баға тұрақ орнына сұраныс пен көшедегі көлік ағынына байланысты болады.
Қала үш тарифтік деңгейге бөлінді. Мәслихат шешіміне енген 338 учаскенің жартысынан көбі – ең жоғары, 200 теңгелік санатта. Тарифтік аймағы әлі анықталмаған тұрақтарда базалық баға – сағатына 100 теңге сақталады. Бір көшеде, тіпті бір тұрақ аймағында әртүрлі тариф қолданылуы мүмкін. Сондықтан нақты учаскенің бағасын мәслихаттың № 353 шешімінен немесе тұрақтағы белгіден тексерген жөн.
Ең қымбат аймақтар қаланың орталығына – Достық, Назарбаев, Абылай хан даңғылдары мен Көк базар төңірегіне шоғырланған. Сағатына 100 теңгелік учаскелер, негізінен, орталықтан тыс, көбіне қаланың батыс бөлігінде орналасқан.
Әкімдіктің аталған тарифтің енгізілуіне қатысты басты дәлелі – 10 жылда көлік саны күрт өсіп, тұрақ орны жетпеуге айналды. Қалалық жол қозғалысын ұйымдастыру және жолаушылар көлігі басқармасының басшысы Ержан Диханбаевтың мәслихат сессиясында келтірген деректеріне жүгінсек, қалада 730 мыңнан астам көлік тіркелген;
басқа елді мекендерден күн сайын кіретін көлікпен бірге қала көшелеріндегі машиналар саны 1 миллионнан асады; Алматыда шамамен 17 мың ақылы тұрақ орны бар, оларды күн сайын 56 мыңға жуық көлік пайдаланады.
Сараланған тариф идеясы жаңа ғана пайда болған жоқ. Ақылы тұрақтардың операторы бұдан біраз жыл бұрын сұраныс 80%-дан асатын учаскелерде бағаны 50 теңгеге көтеріп, сұраныс төмен жерлерде төмендетуді ұсынған. Сол кездегі мәлімдемеге қарағанда, 2016 жылы ақылы тұрақтар енгізілгеннен кейін қала орталығындағы көлік саны 15%-ға азайған.
Роза РАҚЫМҚЫЗЫ