Ақтөбе облысының арнайы прокурорлары интернет-дүкен арқылы бүкіл елге психотроптық заттар сатумен айналысқан ұйымдасқан қылмыстық топқа қатысты тергеу ісін аяқтады, деп хабарлайды Aqshamnews.kz тілшісі.
Бұл факт Ақтөбе облысы полиция департаментімен бірлесіп жүргізілген іс-шаралар барысында анықталды. Дүкеннің жалпы айналымы 50 млн теңгеден асқан.
Интернет-дүкен «Telegram» қосымшасында «байланыссыз қатысу» форматы арқылы жұмыс істеген, ал ақша қаражаттары «дропперлердің» банктік карталары арқылы айналымға түскен.
Қолданылған заң нормалары: ҚР Қылмыстық кодексінің 262, 297, 299-1-баптары (ұйымдасқан топ құру, оған басшылық ету, есірткі және психотроптық заттарды заңсыз иемдену, сақтау, тасымалдау, өткізу, насихаттау немесе жарнамалау).
Жедел-тергеу іс-шаралары барысында Қарағанды, Солтүстік Қазақстан, Ақтөбе облыстары және Астана қаласында 6 адам ұсталды. 10 кг-нан астам психотроптық зат тәркіленді.
Тергеу органдарының тиімді әрекеттерінің арқасында интернет-дүкен толық жойылды. Қазіргі уақытта қылмыстық іс сотқа жолданды.