Бүгін ұлыстың Ұлы күні – Наурыз мерекесіне орай облыстық дін істері басқармасының ұйымдастыруымен діни бірлестік өкілдері арасында «Дәстүріміз жаңғырған» шығармашылық байқауы өтіп, Ақтөбе облыстық орталық «Нұр Ғасыр» мешіті жеңімпаз атанды,- Almaty-akshamy.kz.
Қазақ халқының дәстүрін дін өкілдері арасында насихаттап, болашақ жастарға дәріптеу мақсатында өткен іс-шарада облыстық дін істері басқармасының басшысы Әлімбек Тұралиев сөз сөйлеп, наурыз мерекесімен құттықтады.
Шараға «Өмір бұлағы» ҚБ, «Криша қоғамының санасы» ҚБ, «Надежда» Ақтөбе евангельдік христиан-баптистер шіркеуі» ҚБ қатысты.
Шығармашылық байқау әр діни бірлестік өзін таныстырудан, салт-дәстүр туралы көрініс және «Ұлттық тағамдар» аукционы туралы ІІІ бөлімнен тұрды.
Дода барысында діни бірлестік өкілдері қазақ халқының беташар, бесік салу, қыз ұзату т.б салт-дәстүрлерді қойылым ретінде көрсетті. Сонымен қатар «Ұлттық тағамдар аукционы» бөлімінде қатысушылар әрбір ұлттық тағамның жасау техникаларын түсіндіріп өтті.
Шығармашылық байқаудың таныстыру бөлімінде «Нұр Ғасыр» мешітінің баспасөз хатшысы, журналист Ақтолқын Орысбайқызы дін мен салт-дәстүр егіз ұғым екендігінде тоқталып, ҚМДБ бекіткен 2022 жыл – Ислам – ынтымақ және бірлік діні жылы екендігінде атап өтті. Сонымен қатар діндер арасындағы татулық мәселесінеде тоқталды. Бүгінгі таңда Ақтөбе облысы бойынша өкілдігінде салт-дәстүр мен дін тақырыбындағы атқарылып жатқан іс-шаралардың маңыздылығын айтты.
Ал көрініс бөлімінде облыстық орталық мешіттің ұстазы Ардақ Бағдалқызының жетекшілігімен мешіттегі «Әжелер» мектебінің белсенді мүшелері және шәкірттердің қатысуымен «Беташар» рәсімі қойылды.
Одан өзге үшінші бөлімінде қазақ халқының ұлттық ет тағамдарының бірі – қазақша ет асылып, біздің халқымыздың құрметті кісілерге ұсынатын кәделі, әрі орны бөлек тағамдарының ең бастысы – қазақша ет екендігі түсіндірілді. Сонымен қатар наурыз көже ұсынылып, қалай дайындалатындығы туралы баяндады. Одан өзгеде ұлттық тамақ түрлерін көрсетіп, таныстырылды.
Байқау қортындысында әділқазылардың шешімі бойынша «Нұр Ғасыр» мешіті үздік деп танылып, І орынмен марапатталды. Ал «Өмір бұлағы» ІІ орын, «Кришна қоғамының санасы» ІІІ орын, «Надежда» діни бірлестігі «Белсенділік танытқаны үшін» номинациясын иеленді.