Ақтөбеде танысын "Отбасы банк" арқылы жеңілдетілген бағдарлама бойынша баспана алып беремін деп сендіріп, ірі көлемде ақша алған әйелге сот үкімі шықты, деп хабарлайды Аqshamnews.kz тілшісі «Диапазон» газетіне сілтеме жасап.
Белгілі болғандай, алаяқтық әрекетке барған 39 жастағы әйел көпбалалы анаға жеңілдікпен үй алуға мүмкіндік барын айтып, соған көзін жеткізген. Жәбірленуші оған бастапқы жарна ретінде 2 миллион теңге аударған. Алайда уәде етілген баспана берілмеген соң, әйел полицияға жүгінген.
Тергеу барысында айыпталушының тағы бір жәбірленушіден 3 миллион теңге алғаны анықталды.
Сотта күдікті өз кінәсін толық мойындап, «Отбасы банкке» еш қатысы жоғын, жалған уәде бергенін айтты. Оның айтуынша, ақшаның бір бөлігін құрылыстың бастапқы кезеңінде (котлован сатысында) пәтер сатып алуға жұмсамақ болған, бірақ мәміле жүзеге аспаған. Кейін ол жәбірленушілердің қаражатын өз ем-домына шығын еткенін мойындады.
Сот айыпталушының екі баласы барын және қазір үшінші баласын күтіп жүргенін ескерді. Амнистия нормаларын қолдана отырып, әйелге 2 жыл 8 ай мерзімге бас бостандығын шектеу жазасы тағайындалды. Сонымен қатар ол жәбірленушілерге келтірілген 5 миллион теңге материалдық шығынды өтеуге міндеттелді.
