Самара-Шымкент трассасының Ырғыз ауданына жақын орналасқан учаскесінде түнгі уақытта шетелдік жолаушылар мінген автобус бұзылып қалған, деп хабарлайды aqshamnews.kz
Бұл оқиға Ақтөбе облысының Ырғыз ауданына қарасты жол учаскесінде орын алды. Автобус ішіндегі 52 жолаушы түнде жолда қалып, көмекке мұқтаж болды.
Қазақстанның Төтенше жағдайлар министрлігінің хабарлауынша, барлық жолаушылар эвакуацияланды және олар Ырғыз ауылындағы жылыну пунктіне жеткізілді. Эвакуация кезінде ешкім медициналық көмекке жүгінбеген. Құтқарылған жолаушылардың ішінде 46 Өзбекстан азаматы мен 6 Тәжікстан азаматы болған. Олар қауіпсіз жерге жеткізілгеннен кейін басқа автобусқа отырғызылып, сапарларын әрі қарай жалғастырды.
Бұл оқиға Төтенше жағдайлар министрлігі мен жергілікті құтқарушылардың жедел әрекет етуінің арқасында уақытында шешімін тауып, шетелдік азаматтардың қауіпсіздігі қамтамасыз етілді.