Күнделікті күйбең тіршілікте жанымызға жылу сыйлайтын сәттер болады. Әріптесім Рая Ескендір екеуіміз жол-жөнекей Сейфуллин даңғылы мен Құрманғазы көшесінің қиылысындағы әлеуметтік дәріханаға бас сұққан едік. «Газет оқыңыз, ішінде Алматының соңғы жаңалықтары бар!», – деген әдемі, жарқын дауыс елең еткізді. Бұрылып қарасақ, касса артында тұрған жас қыз қолына біздің сүйікті басылым – «Алматы ақшамын» ұстап, оқырманға ұсынып жатыр екен.
Жақындап таныссақ, есімі – Рахима Турусова. Қарапайым сатушы-консультант қана емес, нағыз елгезек, елге жанашыр жан екені бірден білінді. Өз ісіне ұқыпты, сөйлеген сөзі жылы, жүрегі мейірімге толы. Баспасөзге, ақпаратқа деген құрметін көріп, еріксіз қуанып қалдық. Мәдениеттіліктің белгісі. Мұндай жандарды газетіміздің көрінбейтін жанашыры, басылым мен оқырман арасындағы алтын көпір деуге әбден болады.
Рахима сынды ұлттық басылымға жанашыр жастар көбейсе екен. Олар басылымның рухани құнын арттырып қана қоймай, қаланың тіршілігін, жаңалығын көпке жеткізуге үлес қосып жүр. «Алматы ақшамы» – қала өмірінің айнасы. Ал оны оқырманға ұсынатын, осындай шынайы жанашырлар – біздің ең басты тірегіміз.