АҚШ пен Қытай TikTok әлеуметтік желісіне қатысты "негізгі құрылымдық" келісімге қол жеткізді. CNBC жазуынша, бұл туралы АҚШ жаржы министрі Скотт Бессент мәлімдеді, - деп хабарлайды Аqshamnews.kz тілшісі Factcheck.kz-ке сілтеме жасап.
"Бұл екі жеке компания арасында болып отыр, коммерциялық шарттары келісіліп қойған", – деді ол Мадридте өткен АҚШ пен Қытай арасындағы келіссөз барысында.
Президент Дональд Трамп пен Қытай президенті Си Цзиньпин жұма күні келісімнің нақты шарттарын талқыламақ. Трамп Truth Social парақшасында жастар "сақтап қалғысы келген" компанияға қатысты келісім жасалғанын жазды.
Бессенттің айтуынша, бұл келісім TikTok-тың АҚШ бақылауына өтуіне жол ашуы мүмкін. Ал TikTok әзірге түсініктеме берген жоқ. Reuters жазуынша, Қытайдың бас сауда келіссөзшісі Ли Чэнган да келісімнің бар екенін растаған әрі АҚШ-ты қытайлық компанияларға қысым жасамауға шақырған.
Бұл мәлімдемелер АҚШ пен Қытай арасындағы кейінгі сауда келіссөздері аясында айтылды. Соңғы айларда тарифтер мен сауда шектеулеріне байланысты екі ел арасындағы қатынас шиеленісе түскен еді.
TikTok-тың иесі ByteDance 17 қыркүйекке дейін АҚШ-тағы бизнесін сатуға тиіс болған, әйтпесе қосымшаның жұмысы ел аумағында тоқтатылуы мүмкін. АҚШ-тың сауда өкілі Джеймисон Грир келісімге қол қою үшін мерзімді сәл кейінге қалдыру қажет болуы мүмкін екенін, бірақ бұл шексіз созылмайтынын айтқан.
Былтыр Конгресс Apple мен Google сияқты қосымша дүкендеріне TikTok-ты таратуға тыйым салатын заң қабылдаған. Трамп қаңтарда бұл шешімді уақытша тоқтатып, ByteDance-ке мәміле жасауға қосымша 75 күн берген еді. Кейін бұл мерзім бірнеше рет ұзартылды.
Шілдеде АҚШ-тың сауда министрі Ховард Латник Қытай АҚШ-қа қосымша автономия бермесе, TikTok Америкада жабылатынын мәлімдеген. Трамп маусымда Fox News арнасына берген сұхбатында қосымшаны сатып алуға дайын "аса ауқатты адамдардың" барын айтқан, бірақ олардың есімдері әлі жарияланбады. Бұған дейін ол TikTok-тың АҚШ-тағы нұсқасын Oracle басшысы Ларри Эллисон немесе Tesla басшысы Илон Маск сатып алуы мүмкін екенін де хабарлаған. Сонымен бірге Perplexity жасанды интеллект стартапы және кәсіпкер Фрэнк МакКурттің Project Liberty тобы да сатып алуға өтініш берген.