«Alatau Aqparat» медиахолдингі мен «Түркісой» халықаралық түркі мәдениеті ұйымы бірлесіп, «Алматы ақшамы» газетінің фототілшісі Самат Серікбайұлының «Ұлы даланың салт-дәстүрі» /Türk Yurtlarında Büyük Bozkırın Kültürü/ фотокөрмесін ұйымдастырады, деп хабарлайды aqshamnews.kz
Құсайынов Самат Серікбайұлы – Сарысу ауданының тумасы, қазақ журналистикасының қайраткері, Қазақстан Журналистер одағының мүшесі, Ақпарат саласының үздігі, «Алматы Ақшамы» газетінің фототілшісі. Ұзақ жылдар бойы қазақ баспасөзінде еңбек етіп келе жатқан Самат Серікбайұлы еліміздің мәдени-әлеуметтік өміріндегі маңызды оқиғаларды фото арқылы халыққа жеткізіп келеді. Ол қазақтың мәдениеті мен табиғатын, дәстүрі мен рухын бейнелеу арқылы тарихи құндылықтарды сақтауға зор үлес қосып жүрген кәсіби фотожурналист.
«Ұлы дала мәдениеті» көрмесі — Қазақ даласының тарихы, мәдениеті және өмір салтын таныстыру мақсатындағы ерекше шара. Көрме Қазақстанның кең байтақ географиясын, оның тарихи және мәдени мұрасын, дала тұрғындарының табиғатпен үйлесімді өмірін бейнелейді.
«Ұлы дала мәдениеті» көрмесінде Самат Серікбайұлы Қазақстанның әр аймағындағы адамдардың күнделікті өмірін бейнелеп, олардың қонақжайлылығын, дәстүрлерін және табиғатпен байланысын көрерменге әсерлі жеткізеді. Оның шығармалары ұлттық мәдени мұра ретінде бағаланып, фотожурналистика саласындағы жетістіктерімен халық арасында танымал.
Көрменің басты мақсаты — Қазақстанның мәдени мұрасын танытып, Ұлы Даланың бай тарихын көркем тілмен баяндау.
Баршаңызды көрмеге келіп, осы ерекше мәдени шараны тамашалауға шақырамыз!
Өтетін орны: Анадолы өркениеттер мұражайы
Өтетін күні: 2024 жылғы 3 қазан
Уақыты: 15:00
Кіру тегін.