Қазақ және түркі анимациясының негізін қалаушы Әмен Қайдаровтың 100-жылдығына арналған «Әмен ағаның ғажайып ағашы» атты қысқаметражды анимациялық фильм жарыққа шығады, деп хабарлайды Almaty-akshamy.kz Inform.kz-ке сілтеме жасап.
Анимациялық картина ҚР Мәдениет және спорт министрлігінің тапсырысы бойынша Ұлттық киноны қолдау мемлекеттік орталығының қолдауымен «Қазақфильм» киностудиясында түсіріліп жатыр. Анимациялық фильмнің сценариін Әмен Қайдаровтың шәкірті Тамара Мұқанова мен қазақ мифологиясын зерттеуші, жазушы, киносценарист Зира Наурызбаева жазды.
Қазіргі таңда кейіпкерлердің бастапқы эскиздері дайын.
«Фильм желісі Әмен ағаның Бауыржан Нөгербековтың «Қарлығаштың құйрығы неге айыр?» фильмінде жұмыс істеген жылдарымен тікелей байланысты. Ол кісіге шабыт қалай келді, түсірілім кезіндегі бастан кешірген қиыншылықтары мен қызықтары жайлы баяндалады. Негізгі мәліметтер мен әдеби деректер көзі Бауыржан Нөгербековтың «Когда оживает сказки» кітабынан алынды»-, деді фильмнің қоюшы режиссері Жанәділ Байдарбеков.
Айтуынша, жобаға 10-нан аса адам жұмылдырылған. Жоспар бойынша жыл соңына дейін туындыны аяқтау міндеті тұр.
«Жалпы 10 минуттық фильм жасауға кемінде жарты жыл уақыт кетеді. Қазір бізде техникалық тұрғыдан біраз қиындықтар бар. Себебі суретте тек мультфильм жасаушыларды ғана емес, Әмен ағаның жанында жұмыс істеген атақты суретшілер, танымал композиторлар- Нұрғиса Тілендиев, Олжас Сүйлеменов сынды мәдениетіміздің көрнекті қайраткерлерінің образын, түр әлпетін барынша ұқсатып келтіру үлкен жауакершілікті жүктеп отыр» деп бөлісті режиссер.
Жаңа анимациялық фильм қазақстандық көрерменге алдағы жылдың көктем айында Әмен Қайдаровтың 100 жылдық мерейтойы қарсаңында жол тартады.