Қазақстан Республикасы Денсаулық сақтау вице-министрі Ерлан Нұрлыбаев азаматтардың медициналық көмекке қатысты өтініштерін тыңдады. Павлодар облысының зейнеткері өкпенің созылмалы ауруына байланысты Алматы немесе Астана қаласына тексеруге және емделуге жіберуге қолдау көрсетуді сұрады. 3-топтағы мүгедектігі бар баланың анасы Қазақстанда арнайы оңалту орталықтарының жоқтығын айтып, Мәскеуде емделуге көмек көрсетуді өтінді.
Сондай-ақ бауыр трансплантациясын қажет ететін онкологиялық науқас баланың анасы шетелде ем алу мәселесін көтерді. Астана тұрғыны 2008 жылы алған фармацевт-провизор біліктілігін растау мәселесін қозғады, себебі тиісті құжатсыз жұмысқа тұру мүмкін емес. Сонымен қатар уақытша жұмыссыз азаматтар үшін міндетті әлеуметтік медициналық сақтандыру (МӘМС) талаптарын қайта қарау, психикалық ауруларды диагностикалауды күшейту, медициналық мекемелердің жұмысына қатысты шағымдар көтерілді. Ерлан Нұрлыбаев барлық мәселелер жан-жақты қаралып, Денсаулық сақтау министрлігі олардың шешімін табуға барынша күш салатынын мәлімдеді.
ҚР Қаржы нарығын реттеу және дамыту агенттігі төрағасының бірінші орынбасары Нұрлан Абдрахманов азаматтардың қаржылық қиындықтарын шешуге қатысты өтініштерін қабылдады. Астана тұрғыны алаяқтық жолмен өз атына несие рәсімделгенін айтып, мәселені шешуге көмек сұрады. Атырау тұрғыны «Даму» бағдарламасы аясында бизнесін дамыту үшін 170 млн теңге несие алғанын айтып, бір жылға кейінге шегеруді өтінді. Тараз қаласының тұрғыны несиелері мен микрокредиттерін қайта қаржыландыру бойынша көмек сұрады. Сонымен қатар, азаматтар банк қызметтеріне қатысты шағымдарын жеткізді. Нұрлан Абдрахманов агенттік барлық өтініштерді мұқият зерттеп, қолданыстағы заңнама аясында көмек көрсететінін, ал банк заңсыз әрекеттерге жол берсе, тиісті шаралар қабылданатынын айтты.
Мәжіліс депутаты, «AMANAT» партиясы фракциясының мүшесі Тілектес Адамбеков кәсіпкерлікті қолдау және әлеуметтік көмек мәселелері бойынша азаматтарды қабылдады. Кездесу барысында материалдық көмек көрсету, сот шешімдерімен келіспеу, дәрігерлер жұмысына шағымдар талқыланды. Қарағанды облысының кәсіпкері шағын және орта бизнесті қолдау мәселесін көтерді. Семей тұрғыны церебралды сал ауруымен (ДЦП) ауыратын баласын емдеуге қатысты сұрақ қойды. Алматыдан келген кәсіпкер мектептердегі кітап қорларын дамыту бойынша бастама көтерді. Ақмола облысының тұрғыны су тасқыны салдарынан баспанасы бүлінгеннен кейін тиісті көмекті ала алмағанын жеткізді.
«Атамекен» ҚР Ұлттық кәсіпкерлер палатасы басқарма мүшесі – басқарма төрағасының орынбасары Тимур Нақыпбеков кәсіпкерлерді қолдау мәселелері бойынша өтініштерді тыңдады. Алматы тұрғыны шағын бизнесті қолдау шаралары туралы сұрады. Ақтөбе тұрғыны жергілікті атқарушы органдар мен кәсіпкерлер арасындағы өзара іс-қимылды жақсарту бойынша көмек көрсетуді өтінді. Қарағанды облысының жас кәсіпкері техникалық мамандықтар бойынша жастарды даярлайтын білім беру филиалын ашу бастамасын ұсынды. Сондай-ақ, ұлттық киім тігумен айналысатын көпбалалы ана қолдау сұрады.
Тимур Нақыпбеков барлық өтініштер тиісті құрылымдармен бірлесіп қарастырылатынын, ал «Атамекен» кәсіпкерлердің бастамаларын барлық деңгейде қолдайтынын айтты.
«AMANAT» партиясының қоғамдық қабылдаулары өз жұмысын жалғастырып, азаматтарға түрлі мәселелер бойынша көмек көрсетеді.
Еске сала кетейік, өз сұрақтарыңыз бойынша «AMANAT» партиясының Республикалық қоғамдық қабылдауына келесі байланыс арналары арқылы жүгіне аласыз:
1. Call-орталық: 8 800 080 4441(Қазақстан бойынша қоңырау шалу тегін);
2. WhatsApp: 8 700 800 4441
3. E-mail: komek@amanatpartiasy.kz
Қабылдауға жазылу кездесуге дейін кемінде 3 күн бұрын жүзеге асырылады.