Өңірлік коммуникациялар қызметінде аудан әкімі Ләззат Жылқыбаева биылғы бірінші тоқсандағы ауданның әлеуметтік-экономикалық даму қорытындысын таныстырып, 2026 жылға арналған негізгі бағытты белгіледі, – деп хабарлайды aqshamnews.kz тілшісі.
Оның айтуынша, Жетісу ауданы қаланың индустриялық орталығының бірі ретіндегі мәртебесін сақтап, тұрақты түрде дамып келе жатыр екен.
«Бірінші тоқсан қорытындысы бойынша біз негізгі экономикалық көрсеткіштердің өскенін байқап отырмыз. Инвестиция 32%-ға артып, шамамен 20 млрд теңгеге жетті. Бұл инвесторлардың сенімі мен аудандағы іскерлік белсенділіктің жоғары екенін көрсетеді», – деді Ләззат Жылқыбаева.
Биыл аудан үлкен инвестициялық жобаларды жүзеге асырмақ. Атап айтқанда, жалпы құны 40 млрд теңгеден асатын «А» санатындағы екі қойма кешенінің («Карина» мен «Техноград») құрылысы, сондай-ақ 12 млрд теңгеге «Жаңа Ялян» мен «Саудакент» сауда орталығын салуды жоспарлап отыр.
Өнеркәсіп саласында да өсім байқалады. Өндіріс көлемі 10%-ға артып, шамамен 60 млрд теңгеге жеткен. Жалпы аумағы 20 мың шаршы метрден асатын үш шағын индустриялық парк іске қосылып, сондай-ақ қолданыстағы кәсіпорындарды кеңейту бағытында да жұмыс істеліп жатыр.
Экономикаға 35 мыңнан астам шағын және орта бизнес нысаны қосымша үлес қосып отыр. Олардың белсенділігінің арқасында салық түсімі 13%-ға өсіп, 100 млрд теңгеге жетіп, 500-ден астам жаңа жұмыс орны құрылған.
«Біздің міндетіміз осы қарқынды сақтап қана қоймай, бизнесті дамыту мен халықты жұмыспен қамту үшін қолайлы жағдай жасау», – дейді аудан әкімі.