Халық саны өскендіктен, оқушы орнының тапшылығын азайту мақсатында Жетісу ауданы әлеуметтік инфрақұрылымды дамытып жатыр. Аудан әкімі Ләззат Жылқыбаева Өңірлік коммуникациялар қызметіндегі брифингте журналистерге аудандағы қолға алынған осы жұмыстар туралы баяндады, – деп хабарлайды aqshamnews.kz тілшісі.
«Келешек мектептері» ұлттық жобасы аясында Боралдай көшесінде 1200 орындық №225 мектеп салынып бітеді. Оны жаңа оқу жылында ашпақ.
Сонымен қатар шілде айының соңына дейін №112 мектепке 300 орындық қосымша ғимараттың құрылысы аяқталып, желтоқсан айында №43 мектепті қайта жаңғырту мен 280 орындық қосымша құрылыс салу жоспарланған.
Қосымша білім беру жүйесі де қатар дамып келеді. Құлагер ықшамауданында балалардың ғылым, техника, өнер, экология мен спорт бағыты бойынша білім алуына мүмкіндік беретін Инновациялық шығармашылық орталығын салу үшін жер учаскесі белгіленді.
«Damu Bala» бағдарламасы аясында ауданда қосымша білім беру қызметін ұсынатын 78 ұйым жұмыс істейді, олар шамамен 5 мың баланы қамтып отыр.