Өңірлік коммуникациялар қызметінің алаңында Алматы қаласының Туризм басқармасының басшысы Ғалия Тоқсейітова осылай деп мәлімдеді, – деп хабарлайды aqshamnews.kz тілшісі.
Алматы туристік инфрақұрылымды дамытып, қызмет көрсетуді арттырып, көлік қолжетімділігін жақсартып, туристерге сапалы қызмет көрсететін жүйе қалыптастыруға басымдық беріп отыр. Негізгі бағыттың бірі – визит-орталықтар желісін жаңғырту. Болашақта олар ақпараттық пункт қана емес, туристерге жан-жақты қызмет көрсететін толыққанды орталыққа айналмақ.
Қалада қазір Алматыны Орталық Азиядағы жетекші туристік орталықтың бірі етуді көздейтін бірнеше жоба қатарынан жүзеге асып жатыр екен.
Қазір қалада туристер көп келетін жерде орналасқан 8 визит-орталық жұмыс істейді. Олар Омаров, Панфилов, Зенков, Байтұрсынов, Тимирязев көшесінде, Достық даңғылы мене «Медеу» спорт кешенінің аумағында орналасқан. Мұнда туристер қаланың көрікті жері, экскурсиялық бағыттар, мәдени іс-шаралар мен туристік өнім туралы толық ақпарат ала алады.
2026 жылдың алғашқы бес айында визит-орталықтардың қызметіне 3 604 адам жүгінді. Оның шамамен 80%-ы шетелдік туристер болыпты. Атап айтқанда, 2 813 шетелдік қонақ пен 791 ішкі турист осыннан кеңес алған.
«Біз визит-орталықтарды туристерге барынша қолайлы ететін үлгіні әзірлеп жатырмыз. Оған әлемнің үздік тәжірибесін негіз етіп алдық», — деді спикер.
Басқармада туристік инфрақұрылымды дамыту тек ақпараттық қызметпен шектелмейтінін атап өтті. Сонымен қатар әуе қатынасын кеңейту, қонақүй желісін дамыту, таулы аймақтардың инфрақұрылымын абаттандыру мен жаңа туристік нысандар салу бағытында да біраз жұмыс істеліп жатыр. Бұл жобаларды іске асыру Алматының халықаралық туристік нарықтағы бәсекеге қабілеттілігін арттырып, туристер ағынын көбейтіп, қаланың өңірдегі жетекші туристік орталықтың бірі ретіндегі мәртебесін нығайта түспек.