Өңірлік коммуникациялар қызметінде Түрксіб ауданының әкімі Дамир Әкежанов 2026 жылға арналған инженерлік желі мен жол инфрақұрылымын жаңғырту жобасы мен қолға алған жоспарлары туралы баяндады, – деп хабарлайды aqshamnews.kz тілшісі.
Оның айтуынша, тұрғындарды базалық инженерлік инфрақұрылыммен қамтамасыз ету негізгі міндет болып отыр екен. Биыл Ақан Сері – Сейфуллин – Шолохов көшесінің аумағында, «Қайрат» шағын ауданында 36,1 шақырым су құбыры мен 47,8 шақырым кәріз жүйесі салынып жатыр. Сонымен қатар, ауданның басқа бөлігінде, соның ішінде «Нұршашқан» шағын ауданының қамтылмаған аумақтарында тағы 51,7 шақырым су құбыры мен 17,8 шақырым кәріз желісі салына бастамақшы.
«Бұл жобалар іске асқанда ауданның 120 мыңнан астам тұрғынының сапалы ауыз су мен кәріз жүйесіне қолы жетеді», – дейді Дамир Әкежанов.
Сонымен қатар «Шығыс қақпалары» тұрғын алабы аясында инженерлік желіге арналған жобалық-сметалық құжаттама әзірленіп жатыр. Электрмен жабдықтау саласында 110 кВ қосалқы станция желілерін салу мен Сүйінбай даңғылы, 503 мекенжайындағы үйлерді қосуға арналған жобалар әзірленеді.
Көшелерді жарықтандыруға ерекше көңіл бөлінген. Биыл ауданда бұрын толық жарықтандырылмаған 30 көшеге шам орнатылады, қуаты жоғары 1825 шам ауыстырылады, 2000-нан астам тірек боялып, «Желтоқсан» паркі мен «Шұғыла», «Сейфуллин» алаңқайларындағы 750 шам да жаңартылады.
«Бұлар тұрғындардың қауіпсіздігі мен жайлылығын арттырып, түнгі уақытта ауданд жарық әрі қолайлы ете түседі», – деп атап өтті аудан басшысы.
Жылумен жабдықтау саласында газ бен жылу желісін де жаңғырту көзделген. «Қайрат» шағын ауданында жаңа көпқабатты үйлерге арнап магистральдық газ желісі салына бастады. 2026 жылдың қыркүйегінде ұзындығы 8,1 шақырым болатын екі учаскедегі жылу желісін қайта жаңартып бітеді. Мамыр айында қосымша 0,7 шақырым желіні жаңарту мен 10 қазандықты жаңғырту жұмысы басталып, оны жылыту маусымына дейін аяқтамақ. Бұдан бөлек, «Шығыс қақпалары» жобасы аясында қуаты 190 Гкал болатын қазандықты да қайта жаңартуды қолға алады.
Бұл жобалар жылумен жабдықтаудың сенімділігін арттырып, жылыту маусымының тұрақты өтуін қамтамасыз етеді.
Жол инфрақұрылымы да қарқынды дамып келеді. 2026 жылы жалпы ұзындығы 23,5 шақырымболатын 38 көшеге орташа жөндеу жүргізіп, 35 мың шаршы метр жол жамылғысын жөндеп, 200 «қалқымалы» люк орнату жоспарланған. Сонымен қатар, ұзындығы 4,3 шақырым Хмельницкий көшесін Талғар тасжолына дейін ұзарту үшін жер учаскелерін сатып алу жұмысы да аяқталып қалды.