Биыл Түрксіб ауданында тұрғындар ұсынған 24 жоба іске асырылуда, деп хабарлайды aqshamnews.kz тілшісі.
Алматының Түрксіб ауданындағы «Жұлдыз» шағынауданында он көпқабатты үйге тиесілі төрт аула күрделі жөндеуден өтті. Жұмыстар № 44–45, № 46, № 18 және № 18А үйлердің ауласын қамтыды. Бұл туралы Түрксіб ауданы әкімдігінің өкілдері хабарлады.
Аулалардағы асфальт жабыны жаңартылып, ашық аспан астындағы жаттығу құрылғылары, орындықтар, қоқыс жәшіктері және шағын сәулет нысандары орнатылды. Балалар және спорт алаңдарына резеңке жабын төселіп, сыртқы жарықтандыру жүйесі жаңартылды, су бұру жүйелері орнатылды. Сондай-ақ бейнебақылау камераларын орнату қарастырылған.
Аулаларды күрделі жөндеуден бөлек, 2026 жылы ауданда тағы 16 аулаға ағымдағы жөндеу жұмыстары жүргізілді.
Қоғамдық кеңістіктерді жаңарту жұмыстары «Халық қатысатын бюджет» бағдарламасы аясында да жүзеге асырылып жатыр. Биыл Түрксіб ауданында тұрғындар ұсынған 24 жоба іске асырылуда. Олардың қатарында 11 сквер мен жүргіншілер аймағын, сегіз балалар және спорт алаңын көркейту, төрт автоматты суару жүйесін орнату және бір автотұрақ салу жобасы бар.
Бағдарлама аясында тұрғындар аулаларды көркейту, қоғамдық аумақтарды жаңарту және қала инфрақұрылымын дамыту бойынша жоба ұсына алады.
Бағдарлама туралы толық ақпарат https://budget.open-almaty.kz/ сайтында жарияланған.