Медеу ауданында әл-Фараби даңғылы мен бірқатар орталық көшелердегі сәулеттік жарықтандыру жұмыстары аяқталды, – деп хабарлайды aqshamnews.kz тілшісі.
Бұл туралы Медеу ауданы әкімдігінің мамандары айтты.
Әл-Фараби даңғылы бойында 33 тұрғын үйге, сондай-ақ екі жолайрыққа — әл-Фараби даңғылы мен Назарбаев даңғылының, әл-Фараби даңғылы мен Достық даңғылының қиылыстарына, сондай-ақ тоннельге сәулеттік жарықтандыру орнатылды. Бұдан бөлек, қалалық ортаның сапасын жақсарту мақсатында ауданда тағы 16 көпқабатты тұрғын үйдің қасбеті жарықтандырылды.
Жоба аясында сызықтық шамдар мен екіжақты прожекторлар орнатылды. Жаңа жарықтандыру жүйесі түнгі уақытта көлік қозғалысы мен жүргіншілер қауіпсіздігін арттырып, қалалық құрылыстың көрнекі қабылдануын жақсартады және ауданның біртұтас жарықтық келбетін қалыптастырады.
Аудан әкімдігінің мәліметінше, жоба тұрғындарға қолайлы әрі эстетикалық тартымды қалалық ортаны құруға бағытталған. Көріктендіру және инфрақұрылымды дамыту жұмыстары жалғасуда.