12–13 ақпан аралығында Алматыда ауа температурасы шамамен –6 °С деңгейінде болып, мұз аралас жаңбыр жауды. Жауын-шашынның аязды ауа райымен қабаттасуы жолдар мен тротуарларда көктайғақтың пайда болуына әсер етті. Бұл туралы қалалық Коммуналдық инфрақұрылым және тұрғын үй инспекциясы басқармасының өкілдері айтты.
Қозғалыс қауіпсіздігін қамтамасыз ету мақсатында коммуналдық қызметтер көше-жол желісін жедел өңдеуді ұйымдастырды. Түнгі уақытта 203 аралас жол техникасы жұмылдырылды. Оның ішінде құм сепкіштер, жол сыпыру-жинау машиналары және көктайғаққа қарсы қоспа себетін арнайы техникалар бар.
Тротуарларды, қоғамдық көлік аялдамаларын, жүргіншілер өткелдерін және қоғамдық кеңістіктерді өңдеу үшін қосымша 95 бірлік шағын техника тартылды. Негізгі магистральдарды жедел тазалау және өңдеу мақсатында арнайы техниканың 25 колоннасы құрылды.
Бір мезгілде 75 жедел бригада мен 2971 жол жұмысшысы қызмет атқарды. Жүріс бөлігі, тротуарлар, аялдама кешендері, жер үсті және жерасты өткелдері, баспалдақтар мен пандустарға арнайы қоспа себілді. Әсіресе негізгі магистральдарға, жолайрықтарға және медициналық, білім беру ұйымдарын қоса алғанда әлеуметтік маңызы бар нысандардың кіреберісіне ерекше назар аударылды.
Жауын-шашын басталғанға дейін көше-жол желісіне алдын ала профилактикалық өңдеу жүргізіліп, бұл мұз қабатының түзілу қаупін азайтуға мүмкіндік берді. Мұз аралас жаңбыр жауған кезеңде жұмыс үздіксіз атқарылды. Жауын-шашын тоқтағаннан кейін көшелерді механикаландырылған тазалау ұйымдастырылды.
Дер кезінде қабылданған шаралардың нәтижесінде қаланың негізгі магистральдарында тұтас мұз қабығының қатуына жол берілген жоқ.
Қазіргі уақытта коммуналдық қызметтер күшейтілген режимде жұмысын жалғастырып жатыр. Көше-жол желісінің жай-күйіне тәулік бойы бақылау жүргізіліп, қажет болған жағдайда учаскелер қосымша өңделеді.