Жетісу ауданында «қасбеттен қасбетке дейін» тұжырымдамасы бойынша ғимараттардың сыртқы келбетін жаңарту және оларға іргелес аумақтарды кешенді түрде көркейту жұмыстары жүргізіліп келеді, - деп хабарлайды aqshamnews.kz
«Таза Қазақстан» акциясы аясында бұл іске жергілікті кәсіпкерлер де белсенді қатысып, қала әкімі Дархан Сатыбалдының көшелердің бірыңғай сәулеттік келбетін қалыптастыру жөніндегі бастамасын қолдады. Бұл туралы Жетісу ауданы әкімдігінің өкілдері айтты.
Аудан әкімдігі қасбет пен қалалық орта элементтерін жаңғырту жұмыстарын жүргізіп жатқан аумақта бизнес өкілдері ғимараттарының сыртқы келбетін ретке келтірумен қатар, оған іргелес аумақтарды көркейту міндетін мойнына алып отыр. Мұндай үйлесімді жұмыстар көшелердің тұтас және біркелкі көрінісін сақтауға, визуалды стильді біртұтас ұстауға мүмкіндік береді.
Сонымен қатар, ауданның негізгі магистральды көшелерінде ірі бизнес нысандарына сәулеттік және контурлық жарықтандыру орнату жобалары қолға алынды. Жарықтандыру бір түсті шешімде жасалып, ғимараттардың сәулеттік ерекшеліктерін айқындаумен қатар, кешкі және түнгі уақытта қаланың эстетикалық көрінісін арттыруға бағытталған.