Қазақстан Жазушылар одағында Ұлттық кітап күні аясында, жыл сайын ұйымдастырылатын «Алматының жас жазушысы – 2025» қалалық байқауының жеңімпаздары марапатталды.
Қазақ тіліндегі шығармалар арасынан үздік деп танылған шығарма – Абай атындағы дарынды балаларға арналған мектеп-интернатының оқушысы Шырайлым Айбекқызының туындысы. Ол өз әңгімесін Сапарғали Бегалиннің «Алданған жолбарыс» атты шығармасының негізінде жазған.
Ал орыс тіліндегі жұмыстардың ішінде ең жоғары бағаны №52 жалпы білім беретін мектептің оқушысы Ренат Беккуловтың «Волшебное путешествие в мир Сапаргали Бегалина» атты шығармасы иеленді.
– Биылғы байқауға 15-17 жас аралығындағы 173 оқушы қатысты. Олар Сапарғали Бегалин шығармаларының желісі бойынша фэнтези жанрындағы туындыларын қазақ және орыс тілдерінде ұсынды. Бұл байқау сөз қадіріне бойлаған, кітапты, руханиятты сүйетін шығармашыл жеткіншектердің жолын ашып, шабыт беретіні сөзсіз. Мерейі үстем болған жастарға сәттілік тілейміз, – деді Алматы кітапханалары директорының кітапхана істері жөніндегі орынбасары Ләззат Спатаева.
Байқау аясында сарапшылар кеңесінің және қазылар алқасының шешімімен 15 жасқа дейінгі авторлар үшін арнайы «Жас дарын – 2025» номинациясы тағайындалды. Бұл аталым бойынша 16 шығарма іріктеліп алынып, авторлар ынталандыру сыйлықтарымен және арнайы сертификаттармен марапатталды.