Алматы қаласының Қылмыстық-атқару жүйесі департаментіне қарасты №11 мекемеде жазасын өтеп жатқан жасөспірімдерге мегаполистегі «Түрксіб» мешітінің бас имамы Қанат Сансызбаев рухани-ағартушылық бағытта дәріс оқыды, – деп хабарлайды aqshamnews.kz тілшісі.
Кездесуде имам әр адамның, үлкен-кішінің мемлекетіміздің тілі, салт-дәстүрі, әдет-ғұрпы, өнері мен өнегесін ұлықтап, осы құндылықты мұра ретінде сақтап, мәдениетін насихаттау әрқашан маңызды екенін атап өтті. Сондай-ақ дәріс барысында жан дүниесі рухани бай, діни тұрғыда сауатты, ой-өрісі кең, ұлттық тәрбиемен сусындап өскен баланың теріс діни ағымдардың жетегіне ермейтінін, ықпалында кетпейтінін, сөйтіп өз қауіпсіздігін өзі сақтай алатынын, елге, қоғамға пайдасы бар білімді азамат болатынын айтты.
«Кездесудің басты мақсаты – аяғын жаза басып қылмысқа ұрынып қалған жастарды келер күннен үміт үзбеуге шақыру, жақсылыққа үндеу, имандылық пен адамгершілік туралы насихаттау және оларды жат ағымдардан сақтандыру», – дейді ҚАЖ департаментінің теолог маманы Ержан Раушанбекұлы.