Алматының Бостандық ауданында 68 аула мен 67 үйдің қасбеті жаңарады, – деп хабарлайды aqshamnews.kz тілшісі.
Бостандық ауданында қалалық ортаны кешенді абаттандыру жұмысы 2026 жылы да жалғасады. Өңірлік коммуникациялар қызметінің алаңында аудан әкімі Азамат Қалдыбеков журналистерге осылай деп мәлімдеді.
«Халық қатысатын бюджет» бағдарламасы аясында жалпы сомасы 2 млрд теңгелік 14 жоба іске аспақ. Оның ішінде қоғамдық кеңістікті жөндеу, жаяу жүргіншілер аймағын жаңарту мен суару жүйесін жаңғырту да бар.
«Халық қатысатын бюджет» бағдарламасы тұрғындарға қалалық ортаны дамытуға тікелей қатысуға мүмкіндік береді. Барлық жобады қала тұрғындарының сұранысы ескерілген», - дейді Азамат Қалдыбеков.
Сонымен қатар, ауданда аула аумақтарын ауқымды жаңарту жұмысы қоса жүргізіледі. Күрделі жөндеу 52 ауланы қамтиды, тағы 16 аулада ағымдағы жұмысы жоспарланған. Абаттандыру аясында 15 мың шаршы метр аулаішілік жол жөнделіп, балалар мен спорт алаңындағы 8 мың шаршы метр жабын жаңартылады, сондай-ақ 500 орындық пен қоқыс жәшігі орнатылады.
Бұдан бөлек, ауданда 67 көпқабатты тұрғын үйдің қасбетін бірыңғай сәулеттік стильге келтіре отырып жаңарту мен кейін сәулеттік жарықтандыру орнату жоспарланған. Жалпы 26 нысанға жарықтандыру жүйесі орнатылады.
«Біз аулалардан бастап ғимараттардың сыртқы келбетіне дейін жайлы қалалық ортаны қалыптастыруды кешенді түрде қолға алдық»,- дейді әкім.
Барлық жобаны жылдың соңына дейін іске асырып бітпек ойда.